د.بەشیر حەداد، لەگەڵ وەزیری رۆشنبیری عێراق، تاوتوێی یاسای جەژنی نیشتمانی کۆماری عێراقیان کرد
رۆژی چوارشەممە، رێکەوتی 24 شوباتی 2021، دکتۆر بەشیر خەلیل حەداد، جێگری سەرۆکی ئەنجومەنی نوێنەرانی عێراق، لە نووسینگەی تایبەتی خۆی لە شاری بەغدا پێشوازی کرد لە د.حەسەن نازم، وەزیری رۆشنبیری عێراق و شاندێکی یاوەری.
لە کۆبوونەوەیەکدا، کە سەمیعە غەلاب، سەرۆکی لیژنەی رۆشنبیری و گەشتوگوزار و شوێنەواری ئەنجومەنی نوێنەران و ژمارەیەک لە ئەندامانی لیژنەکە تێیدا ئامادەبوون، باس لە چەندین بابەتی گرنگ کرا کە جێگەی بایەخی ھەردوولا بوون، لە پێش ھەمووشیانەوە پرۆژە یاسای جەژنی نیشتمانی کۆماری عێراق، و یاسای پشووەکان و رێوڕەسمە فەرمییەکان.
لە گوتەیەکدا، دکتۆر بەشیر حەداد جەختی لەسەر گرنگی دەرچوونی یاسای وەزارەتی رۆشنبیری و رێکخستنی کاری وەزارەت بەشێوەیەکی یاسایی کردەوە، و ئاماژەشی بە گرنگی بەردەوامی ھاوئاھەنگی و ھاوکاریی نێوان وەزارەت و لیژنەی رۆشنبیری ئەنجومەنی نوێنەران و تێپەڕکردنی کێشە و رێگریەکانی بەردەم پرۆژە یاساكانى وەزارەت و چالاککردنی چالاکییە رۆشنبیرییەکان و زیندووکردنەوەی شوێنەوارەکان کردەوە.
لەلایەن خۆیەوە وەزیری رۆشنبیری و گەشتوگوزار و شوێنەوار، خۆشحاڵی خۆی دەربڕی بۆ ئەو چاوپێکەوتنە و تاوتوێکردنی چەندین بابەتی گرنگ لەگەڵ دەستەی سەرۆکایەتی و لیژنەی رۆشنبیری پەرلەمان بەمەبەستی بەرزکردنەوەی ئەدای وەزارەت، بەشێوەیەک کە لەگەڵ قۆناغی ئێستا بگونجێت لە جێبەجێکردنی ئەو ڕۆڵەی کە لەسەر شانیەتی.
نووسینگەی راگەیاندنی جێگری سەرۆکی ئەنجومەنی نوێنەرانی عێراق
چوارشەممە 24 شوباتی 2021